Pakistan Peoples Party Official

News, updates, events, photographs and other information

Complete text of Chairman PPP’s speech at Rahim Yar Khan (26 March 2016)

Leave a comment

Bismillah ir-Rahman Nir-Rahim
Naaray’ee Takbeer – Allah O Akbar
Naaray’ee Risalat – Yaa Rasoolullah
Naaray’ee Haideri – Yaa Ali
Naaray’ee Bhutto – Jiyay Bhutto
Aaj SZAB ka nawasa.. Aur bb shaheed ka baita ..Aap ka Bilawal Bhutto soofiyo kee iss dharti per..
Aap kay darmiyaan hai..
Aap sab ko mera salam…
Mera aur Aap ka saath Aaj ka nahee..
Yeah naslo ka saath hai..
Yeah saath jo SZAB nay roti, kapra aur makaan ka naara laga ker shuro kiya thaa…
Aap uss waqt say hamaray saath hain,,, jab SZAB nay naara lagaya thaa, kay taqat ka sir-chash-ma awaam hai…
Jab SZAB nay shA-oor diya, jo tumhay taqseem keray wohh zalim hai..
woh mufaad parast hai….
Kisi ghareeb kee ghareeb say ….
Kisi mazdoor kee mazdoor say…
Kisi mazloom kee mazloom say..
Lararii nahee bantee…
Hamari laraii unn say hai jo ghaa-sib hai..
Jo mufaad parast hain..
Qamzoor Aap nahee, woh hain…
Lay-kin agar Aap mutay-hid ho jaaoo…
Aur apnay haqooq kay liyay awaaz buland kerain,
Yahi who awaaaz thee, jis nay Aaj tak Aap kay dil main ghar kiyaa…
Aur issi kee saaza, SZAB ko milli..
Kay uss nay Aap kee khatir, Aap kay haqooq kee khatir,
Aap kay bacho kee khatir ,
Aap kay bhujthay huway choolo kee khatir,
apnay tabqay say BAGAWAT kee,
Roti, Kapra aur Makaan ka naara lagaya…
Kya Waja thii, kay SZAB nay apnay Tabqay say bagawat kee?

Main batata hoon…Bagawat kya hai…
Uss nay Ghareeb kay khilaaf honay wali har saazish kay khilaaf, bagawat kee….uss nay uss tabqay kay khilaaf bagawat kee, joo ghareeb ko ghareeb tarr dekhna chahta hai…
Aur agar koi ghareeb kay haq main kharra hota hai, tou woh ussay khatam ker day-tay hain..
SZAB kee bagawat, uss system kay khilaaf thee,
jo ghareeb kay haq per daaka daalta hai, uss nay barabri aur masawaat kay haq main naara lagaya,
Uss nay ghareeb ko haqooq dainay kee baat kee, uss nay daulat kee taqseem kee baat kee, uss nay zameeno kee taqseem kee baat kee, taa-kay ghareeb ko uss ka haq mill sakay…

Khuda nay hum sub ko barabar paida kiya hai,
SZAB nahee chahtay thay, kay hamaray haan 2 Pakistan hoon…aik ghareeb ka Pakistan aur aik Ameer Ka Pakistan…uss nay iss adam-masawaat kay khilaaf bagawat kee.
Gharee-boon kay liye, baat kerna tou asaan hai, magar unn kay liye qurbaani daina, utnaa hee mushkil. Aaj baat karnay walay tou bohut hain, magar unn kay liye jaan daina sirf Bhutto jaantay hain.
Iss bagawat kee saaza, un-hain shaheed ker kay dee gayee…
Bhutto nay Jaan day dee, magar ghareeb ka saath naa choora…
Meri maaa SMBB nay, apnay walid kay alam ko phir say buland kiyaaa…Aur SZAB ka mission jaari rakhaa.. Aap kay haqooq kee jang jaari rakhi…aik baar phir, aik Bhutto nay apnay tabqay say bagawat kee, mardo kay samaaj main, aurat kay haqooq kee baat kee, barabri kay saamaj kee baat kee, uss nay iss system kay khilaaf bagawat kee, jiss main mard ko aurat per, aur ameer ko ghareeb per foqiat haasil hai,
Woh aurat honay kay bawajood har zaalim say takrayee…Iss mulq kee khatir, Aap kee khatir, deshat-gardoon ko lal-kaara, aur mufaad parasto kay khilaaf jang jaari rakhee, aur sab say man-waya kay,,, dartaay hain bandoo-qoon walay aik nahatee larkee say…
Aik baar phir tareekh duh-raii gayee….aur aik baar phir say aik aur nahatay Bhutto ko awaam kay darmayaan shaheed ker diya gaya..
Qudrat nay Benazir kee izzat mazeed kee
Baiti Shaheed hogayee Bhutto Shaheed kee
Gharee-boon kee awaaz ko aik baar phir say khamoosh ker diya jaata hai.
Mazloom aik baar phir, bay-sahara ker diyaa gaya…
Woh samajhtay thay, kay abb in gharee-boon kay liye koee awaaz nahee uthaye-gaa
Woh samajhtay thay, kay abb in muzloomo kee koee awaaz nahee banay gaa…

Magar sun looo….
Aaj SZAB kay nawasaaay nay,
Aaj BiBi Shaheed kay baitaay nay,
Phir say woh jhanda uthaa liya hai…
Yeah jhanda jo gharee-boon ka jhanda hai,
Yeah jhanda jo Kisaano ka jhanda hai,
jo meh-koomo ka jhanda hai,
jo mehnat-kashoo ka jhanda hai…
uthoo meray ghareeboon, meray mehnat-kashoo, main Aap kay saath hoon, main kabhee Aap ka saath nahee choroon-ga…

Haan main jaanta hoon kay, yeah raasta asaan raasta nahee…
Haan main jaanta hoon kay, yeah bagawat ka raasta hai…
Aur main iss bagawat kee sazaa bhee jaanta hoon..
Hamari yeah bagawat Aaj bhee unn kay khilaaf hai, jinn kaa iss qaum kay wasa-ill per qabza hai…Jinn kee waja say, Ghareeb , ghareeb-tarr hota jaa raha hai, taleem aur sehat kee bunyadi Sahoo-li-yaat say bhee, mehroom hai…
Shiddat pasandi barthee jaa rahee hai,
Mulq inteshar ka shikaar hai.Hamari qaum kay ghareeb, jo kay iss mulq kee aksiriat hain… Second class citizen kay taur per zindagi guzarnay per majboor hain.
Meray naana, SZAB nay jab Bagawat ka ailaan kiya thaa, tou unhon-nay kaha thaa kay
“Yeah iss mulq kay Ghareeb kee kismat main nahee likha, kay woh hamesha ghareeb hee rahain”
Iss mulq kay ghareeb kee kismat ko badalna hogaaa, Iss mulq kee taqdeer sirf or sirf uss waqt hee badlay gee, jab hamaray mulq kay ghareeb ka bhee wohee darja hogaa, jo iss mulq main ameer ka hai..
Meray Janoobi Punjab ka haal, tou hum sab kay saamnay hai….kasht-kaar bayhaal hain, paani, sehat, taleem, tarraqi, har show-baa nazar-andaaz hai, her bunyadi sahoolat say janoobi Punjab mehroom hai, baqi soobo ka bhee, yahee haal hai …Sindh bhee mehroom hai, Balochistan bhee mehroom hai, KPK bhee mehroom hai, Gilgit Baltistan bhee mehroom hai, AJK bhee mehroom hai, Pooray ka Poora Punjab bhee mehroom hai, siwa-yae aik shehr kay chand hissoo kay ilawaa.
bunyadi zarooriat ko nazar-andaaz ker kay, aik makhsoos tabqay ko ameer say ameer-tar kiya jaa raha hai…Ghareeb kay khilaaf saazish jaari hai…
Kyaaa!!! inn mufaad parasto say, apnaa haq cheen-naa chah-tay hoo…
Aaoo!! in ghaasi-boon ko phir say yaad dila-aen, kay taqat ka sir-chash-ma awaam hai…
Aaoo!! aik baar phir say SZAB aur SMBB kay khawaab ko poora karain…
Agar Aap yeah jang jeetna chahtay hoo, tou main Aap kay saath hoon….!!
Aaoo meraa saath dooo…
Aaoo awaaz buland karoo..
Aaoo aik baar phir say apnay haq kee jang laroo..
Aaj Kisaan bay-haal kyoon hai…ghurbat kyoon barr rahee hai, mehngayi kyoon arooj per hai..
Main Aap say poochtaa hoon…
Aaj Aap kee Fasal ka kya haal hai….
Aaj Aap kay gun-nay kee fasal ka kya haal hai..
Aap kee gandum ka kya haal hai..
Aap kee kapaas kee kya haalat hai…
Aap kay chawal ka kya haal hai,
Aap kay tamatar ka kya haal hai,
Aap kay aalo ka kya haal hai,
Aaj Aap kiss haal main hain…
Aap ka haal, jo iss hukoo-mat nay kiya hai, woh Aap kay saamnay hai..
Main nay kisee say poocha, Mian Sahab,, ko Kisaan say kiya dushmani hai,,
Tou mujhay bataya-gaya, kay hamara Kisaan Shaheed Zulfiqar Ali Bhutto ko Bohut Azeez thaa,
Yea-hee iss kee ghalti hai, jiss kee sazaa issay mil rahee hai….
Khuda ka shuker hai kay,
Hum Aik mehnti, Dil-aer aur hunar-mand qaum hain..
Hamara Kisaan Mehnat aur delairee main kisee say kum nahee …
Woh apni din Raat kee anthak mehnat say, anaaj paida kerta hai…
Mian Sahab,
Aap nay tou kisaan’o say, achay mustaqbil kay khaaab bhee cheen liye hain…
Kisaan zameen ko Khudaa ka toh-faa aur maa kaa Zewar samajhta hai..
Iss waqt woh iss qeemti zewar ko apnay bachon kee taaleem, Maa Baap kay ilaaj, Beti kee Ruksati kay liye baich-nay per majboor hai…
Sugar Mills ko Arbon kay hissaab say Subsidy dee jaa rahee hay..
Yeah Subsidy gair mulkee bus’oon wali company’o aur orange Train walo kay liyay tou hai, magar bichaaray, Aaloo, Makaee, Gun-naa, Keenu, aur kAapaas kay pareshaan haal Kisaan kay liye nahee hay…
Zaraat kee zabooo-haali aur Noon League kee Naa kaam Mua-shee Policies kee wajah say hamari exports har saal kum ho rahee hai..
iss hukoo-mat ka zaraiee Aj-naas kee export barhanay kee taraf zara bhee deehaan nahee hai…

Mian Sahab,
Aap ko Pakistan kay Bajaye Bhaarti Kisaan kee ziyada fiker hai, jab bhee fasal kee munaasib qeemat hamaray Kisaan ko milnay lagti hai, tou foran Bhaarat say Bhari miqdaar main sabziaa mangwa ker Aap hamaray Kisaan ka is-ta-saal ker-tay hain,
Khuda janay kiss baat ka badla hamaray Kisaan say liya jaa raha hai…
Lutt gaya Aaloo ka kisaan,
bay-haal ho gaya makaee ka Kisaan,
deewaliya ho gaya kapaas ka Kisaan,
Sub Kisaan pareshaan…

Mian sahab,
Jab Kisaan Pareshaan tou dukaandaar pareshaan, Dukaandaar pareshaan tou chotay Taajir pareshaan,, Aaam Aadmi pareshaan..
Agar aaj Kisaan, dukaandaar, aur chotay Taajir pareshaan hain, tou Mian sahab,
Kal mill malikaan bhee Pareshaan hon-gay..
Kyon-kay tamaam Economic Activity kee bunyaad Kisaan hain…
Mian Sahab,
Aap nay Kisaan package kaa Aelan kiya… laikin, iss main nayee baat konsi thee,,
Iss kaa Kisaan ko kiya faaida huaa….
Aap ka Kisaan package Aap kay patwa-rio kee nazar hogaya hai..
Iss waqt Kisaan kee haalat yeah hay, kay Urea aur tractor khareednay kee taqat bhee nahee rakhta,
Mian sahib, Aaj bhee aap kay pass Diesel sasta kernay kee bohut gunja-eesh hai..
Urea ko Kisaan kee pohonch main laayen..
Iss waqt soorat-e-haal yeah hai kay hukoo-mat idaaray baich rahee hai, aur Kisaan zinda rehnay kay liye, apni maa ka Zewar baich-nay per majboor hain…
Mian Sahab,
Iss piya-ray mulk kay bicharay Kisaan, dukaandaar, Mazdoor, Aam sar-kaari mulaazim, Chotay Taajir ko itni izzat bhee day-dain,
jitnee Orange Train, Metro Bus aur Nandi-Pur kay consultants ko Detay hain…
Mian sahab,
Aap ko tou apna qarz maaf ker-wa-nay kee aadat hai, magar mera woh Kisaan jo zaraiii bank say qarzaa laitaa hai…
jis per kabhee sooood Nau (9) feesad hota tha, kyaaa Aap ko andaaza bhee hai kay Aap nay ussay ab Pandra (15) say Sola (16) feesad ker kay kitna barra boojh hamaray Kisaan’o per daal diya hai…
Zar-aee bank, yeah daawa tou baar baar kerta hai, kay Aap kay daur main record munaafa ho raha hai…
lay-kin kyaaa Aap ko iss baat ka bhee khayal hai, kay yeah munaafa sooood kee soorat main,
kisaan kay bacho’n kaa pait kaat ker liya jaa raha hai… Aisa Munaafa Haraam ka munaafa hai…!!!
Yeah Haraam hai!!
Meray Bhaiyoo,
Log hum say poochtay hain, kay hum nay apni hukoo-mat main Janoobi Punjab kay liye kya kiyaa…?
Main batata hoon…
Tareekh Gawah hay kay Pakistan Peoples Party nay, hamesha Janoobi Punjab kee meh-room-yoon aur ghurbat kay khaatmay kee jido-jehad kee…balkay apni mohabbat ka saboot Issi khitay se Sadar, Wazeeer-e-Azam, Wazeer-e-Kharja, Wazeer-e-khazana, Speaker qoumi Assembly, Governors aur Wazeer-e-Aalaa bana ker diyaa.
Hum nay apni hukoo-mat main, Janoobi Punjab per record paisa kharch kiya, jo kay qayaam-e-Pakistan say lay ker Aaj tak, tamam doosri hukoo-matoon kay saaray budget millaa bhee diyay ja-aen, phir bhee hamara aik budget, unn tamaam budgets say ziaada hai.
Yahan kee awaam kee sahoolat kay liye, Bahawalpur aur D.G khan main Airport banaya, Multan say Faislabad Motor Way Banayi, Multan Airport ko international Airport ka darja diya,
hamaray hee daur main 5 (Paanch) marla scheme dee gayee,
Rajan Pur say Rahim Yaar Khan ko mila-nay kay liye Benazir Shaheed bridge banaya gaya.
Junoobi Punjab kee taraaqi ka aghaz kiya..
Hamaray waqt main, hamesha Zar-ya-ae inqui-laab aya, aur kisaan khushaal howa…
Hum nay Wheat support price mutaa-Arif karaee, jiss say rural economy mazboot huwi
Hum nay BISP kay zariyay, ghareeb-tar aurtoon ko maali madad farham kee
Hum nay jab bhee Janoobi Punjab kay liyay kuch kerna chahaaa, humain hamesha rokka gaya,
her qadam per toqAA gaya…magar hum nay phir bhee haar na maani..
Hum nay Janoobi Punjab say pehla Wazeer-e-Azam, peeranay peer kee Aulad, Syed Yousaf Raza Gillani ko banaya..magar aik baar phir saazish shuro hogayee, hamaray muntakhib wazeer-e-azam ko, aik khatt na likh-nay kee waja say, saazish kay tehat hataa diya gaya, hum nay Aik aur Wazeer-e-Azam janoobi Punjab kay issi Shehr Rahim Yar Khan say naamzad ker diyaa,
Aik baar phir saazishi anasir ko yeah baat hazzam na huwi, aur uss naamzad Wazeer-e-azam kay ussi din arrest warrants jaari ker diyay gayay, aik baar phir janoobi Punjab say, uss ka haq cheena gaya, Makhdoom Shahabuddin ko wazeer-e-azam kee kursi kay bajayay, Courts kay chakker laga-nay per majboor ker diya gaya…hum nay phir bhee haar na maani.
Meray Logo,
Takht-e-Lahore nay pichlay Aaath baras kee hukoo-mat main junoobi Punjab kay liye (1500) Pandraa sau Arab kay taraqiyaati mansoobon ko budget kee zeenat tou bana diya, magar yeah Aelan, budget kee keetaabon say bahar Aaj TAK naa nikal saka,
Iss Khit-tay main basnay walon ko, Pakistan Peoples Party say Mohabbat kee saza dee ja rahee hai.
Yahan ka hazaron kilometer raqba, paani say mehroom hay.
Insaan aur jaanwar, aik hee jagah say paani peenay per majboor hain

Mairay Bhaiyoo,
main janta ho, kay mehnat tumhari hai, lay-kin mazay koi aur lay raha hai.
Ab yeah Daaaka ziada dair tuk nahee chalay gaa, tumhari kamai per tumhara haq hai, peoples party yeah haq dilwaa ker rahay gi, tum jitna paisa sirf orange train aur metro per laga rahay hoo, utnaa tum nay puray Junoobi Punjab per nahee lagaya.
Hukoo-mat-e-Punjab 162 (aik soo BAA-SATH Arab rupay) sirf 2 lac shehrion kay liyay aik orange line bananay per laga rahee hai…
162 Billion (Aik soo BAA-SATH Arab rupay) – kitna ziaada raqam hoti hai, mien batata hoon…
162 billion (Aik soo BAA-SATH Arab ruppay) Pooray kay pooray South Punjab kay budget say ziaada hai…
Janoobi Punjab, jis kee poori abaadi 4 crore say ziaada hai, uss ka poora budget aik orange line say kum hai!!
Aur sunn loo meray bhaiyoo aur behnoo.. Aik Orange line kee khaatir, hukumat-e-Punjab Aap kay naam per Araboo ruppay kaa qarz uthaa rahee hai, yeah who orange line hai jo shaid aap zindagi main na hee kabhee dekhain-gay or naa kabhee istamal karain-gay …magar aap kaa paisa…iss qaum ka paisa..iss khittay ka paisa…aap say cheen ker…aap kay bacho kee taleem say cheen ker..aap kay gharoo mien saaf paani kee farhami say cheen ker..
Aap kay hospitals main adwee-yaat say cheen ker…aap kee zindagi-yoon say aap ka sakoon cheen ker.. Orange line per lagaya jaa raha hai….
Kab tak looto gay meri qaum kay logo koo.. kab tak apni jaib-aen bharnay kee khatir, mazaaq uraao gay meri qaum kaa…kab tak meri qaum kee kismat say khailtay rahoo gay, in metro projects kay naam per!!!
Kab tak nij-kaari kay naam per, Kau-rion kay daam per, apnay qaumi idaa-roon ko Hus-bay-Mansha logoon ko baich-tay raho gay…
Kab tak mazdooro ko bayroz-gaar ker kay, arboon rupay kamatay raho gay.
Kab tak insaaf kay naam per AAMIR, GHASIB, QATIL, GHADDAR ko mulq say bhaga-tay rahoo gay…
Meray Jiyalo,
Aap sab ko maloom hai kay 4th April (chaar April) ko garhi khuda bux mien, SZAB kee barsi hai, har saal kee tarah, iss saal bhee, hum SZAB ko khiraj-e-teh-seen paish kernay kay liye, wahan per jama hoon gay. Main aap sab ko, pooray Pakistan ko, dawat deta hoon, kay aap Aaien, aur iss Jido-jehad main shaamil ho ja-aein..
Aaj Main Rahim Yar Khan kee awaam ka shukriya adaa kerta hoon,, kay aap BB shaheed kay baitay say, muhabbat ka izhaar kernay, itnee zia-da taadaad main yahan jamaa ho-way hain..
Iss khit-tay nay, meray Shaheed Nana aur Meri Shaheed Maa ko, bohut Mohabbat dee hai, aur iss ka saboot aik baar phir, Inn mushkil haalat main bhee Rahim Yar Khan main, PPP kay umeed-waaroon ko kaam-yaab kerwa ker diyaaa….iss per main Makhdoom Ahmad Mehmood aur party kay ohday-daaroon aur kaar-kunoon ko Mubaarak-baad paish kerta hoon, aur awaam kee iss mohabbat ka shuker guzaar hoon,
Election tou hum jeet gaye, magar, Nawaz Sharif ko aap kee jeet hazum nahee ho rahee,
Nawaz Sharif aap kaa mandate chehn-naa chaa raha hai,
Uthoo aur meraa saath do,
Hum mil ker iss ilaa-qay kee taqdeer badal dain-gay.
Abb wasa-ill ka rukh junoobi Punjab kee taraf morna hoga ..
Aap nay chaha tou…
National Financial Award kee tarah, Soobai satah per Financial Award laaya jaye gaa….
Paani kee taqseem mun-see-faana hogee!!
Junoobi Punjab kay bay-rozgaar Naujawaano kay liye, wafaaq aur soobay main Quota mukhtas hogaa….
Aap nay chaha tou…
Sooba Junoobi Punjab ka Qa-yaam hogaa

Main waada kerta hoon, aap kee ghurbat aur
mehroo-mee Bibi ka beta khatam keray gaa..
Khushaali aap ka muqadar hogi, aur aap kay huqooq Cheen-nay walay apnay Anjaaaam tak
Phonchay-gay,
Takht-e-lahore kay Huk-marano sunn loo,,,
Qaum tum say hisaab maangti hai,
Sun-loo huk-marano, sun-loo,
Aaj woh baghawat, Jiss ka aghaz SZAB nay kiya thaa,
Jiss baghawat ko meri maa SMBB nay Aagay barhaya thaa,
Aaj janoobi Punjab kee yeah awaam,
Yeah mazdoor,
Yeah kisaan ,
Yeah nau-jawan,
Meray saath,
Tumharay khilaaf, bhagawat ka ailaan kertay hain…
Bhagawat uss takht-e-Lahore kay Khilaaf….
Jiss Takht-e-Lahore nay, aap kay 162 Billion
(Aik soo Baa-suth Arab rupees) aik Orange Line per lu-taa diye…
Jiss nay Takht-e-Lahore kay, aik hospital kay budget ko pooray kay pooray janoobi Punjab kay sehat kay budget per, tarjeeh dee,
Aap kay 4 crore logo kee sehat aik taraf, Takht-e-Lahore ka aik hospital aik taraf.
Bhagawat uss takht kay Khilaaf….
Uss System kay khilaaf, jiss main Ghareeb kay khilaaf saazish kee jaati hai…
Jiss takht nay, siasat ko Ameero or Tareeno kee ghar kee londi bana diya hai…
Bhagawat uss takht-e-Lahore kay Khilaaf….
Jiss nay aap kay hissay kee nokriaan doosro main baaant dee…
Jiss nay aap ka paisa cheehn ker apnee jay-boon main daal diyaa
Jab Bhagawat hogi tou
Sab Taj Uchhale Jayenge,
Sab Takht Giraay Jayenge
Aur Raaj Karay Gee Khalq-e-khuda
Jo Main Bhee Hoon Aur Tum Bhee Ho
Hum Dekhain-gay
Lazim Hai Ke Hum Bhee Dekhain-gay
Khuda Hafiz!!
Aap sab say Inshallah 4th April ko Garhi Khuda Bux main mulaqaat hogi.
Jeay Bhutto
Jeay Awaam

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s